 |
|
|
|
 |
|
[Le recensioni
dei film
in programmazione] |
|
|
|
|
 |
|
[Le mostre,
le gallerie,
tutti gli eventi artistici] |
|
|
|
|
| |
|
|
|
| GODOT IN LIBRERIA |
| |
 |
| |
La copertina del libro |
|
|
|
|
Ken'e du sciri, imoi si tòcat sa parti prus traballosa, d'emus cumprèndiu de sa mapa jai e perou in su logu est prus peus ancoras. Est una pareda pèndia a arrabiadura, aici tanti ki su 28x30 no abàstat prus e no fait mancu po is tretus fàtzilis, ca su fundu est totu unu perdaxu.
Donnya tanti cumenti garronaus s'apàrant arrocas mannas ki pàrinti po si nci arrui a pitzus e po si strecai. In is tretus prus lìmpius est spantosu ca sa terra e sa perdixedda funti arrosas arrosas ki no nd'emus biu mai, perou, arrosa o no arrosa, spantu o no spantu, s'afàdiat tropu su pròpiu, e andendi a innantis s'agataus totus stesiaus unu de s'atru, finsas a no si biri mancu prus.
Deu arrimu sa bicicreta a terra e mi firmu a papai pistocus, ca a sighiri di aici no est cosa, ca est mellus a donai a papai a su corpus, ca de si nunca nci pàssat totu sa gana, in su mentras lompit Juanni puru, ki fiat agoa de mei, e papaus e si pasiaus impari. Cumenti torraus a s'apiculai bieus ki a s'acabu s'amancat pagu pagu sceti, ca a cùcuru sa pareda si nci ponit in d-un'arruga mellus, lada e beni tenta ki fait a apedalai sempri.
Si firmaus a prandi a canta 'e un'atra mitza a su costau 'e sa 'ia, e a pusti-pranju si sterreus is istoyas po si nci dromiri inguni in sa 'ia e totu, ca atru logu no ndi du-i fiat. Seus dromendisi' puru ki perou si ndi scìdant unus cant'e stìddius ca fiat cumentzendi a arrosinai, insaras si tòcat a pinnigai totu de pressi e a si ndi fuiri.
Is nuis sighint a tupai su soli totu su meri' e de custa manera apedalaus beni meda, ken'e tenni basca, comuncas su prus 'e su traballu fiat fatu. Calaus a Arenas e si giraus totu su logu, intraus in d-unu fraigarju mannu mannu a castiai totu is màkinas ki du-i funti. Su logu est totu ghetau a pari, in is fentanas is imbirdis ki funti abarraus funti totu brutus e faint intrai una luxi groga. Custa luxi, impari a su colori murenu de s'arruina de totu is màkinas, si nci fait intrai unu sentidu maxiosu e fait parri ki siat scurighendi jai.
Caminaus in pitz'e su pruini a pilladas, is passus nostus ajumai mancu s'intèndinti, su logu fait sa boxi funduda e ndi tòrranta totu is fueddus cun su torraboxi, e no si cumprendit de innui est ki unu est fueddendi, ca no si bieus a pari po sa pagu luxi e po is màkinas mannas mannas ki si cùanta.
S'iat a praxi a sighiri a sprorai totu su logu, perou depeus fai arruga meda ancoras, mancai ki in calada, e insaras si du castiaus de foras cumenti du truessaus po si nd'andai. De imoi a innantis, s'interessu a s'arkiologia fraigarjali est una cosa ki no eus a perdi mai.
Arenas fiat una bidda manna e nci poneus meda a da truessai, in su mentras si pìgat unu sentidu de solesa sintzilla, unu sentidu forti ki perou est bellu puru, sa solesa ki t'assèliat e ti prenit su coru ken'e ti fai timi. Si parit ki su logu e su scusorju suu sìanta totus po nosu, totus po nosu sceti. Su scusorju de su logu est su traballu de is mineris e de is obrarjus, ki innoi batallanta e bincìanta donnya di', contras a s'arrenùntzia e contras a su tentu a si lassai morri. Is mineris e is obrarjus innoi andant a arriscai de morri a conca pesada e ogus deretus a kinikisiat.
In s'ùrtimu tretu si tòcat a passai a cant'e is picas assidosas mannas ke lagus, s'arruga est totu arena moddi ki nci fait açuvai is arrodas e si tòcat a nosu e totu a aturai atentus, po no arriscai ke is obrarjus.
Cumenti arrennesceus a si ndi bogai de cust'arruga açuvosa, ca femus caminendi sempri cun is arrodas cuìndixi centìmetrus cravadas in terra, a sa lestra si lassaus a palas custus ùrtimus montis e intraus in d-unu sartu ki s'arruga d'ant asfartada puru. A sa bon'ora fait a movi is cambas a sa lestra e a sa lèbia, cun su bentu in is pilus e cun su sonu suu in is origas.
Amos Cardia
|
|
|
|
|
